Sie löyät Täränön kylän Pajalan kunnassa Norrbottenissa. Se oon Toornion- ja Kaihnuunväylän keskelä rannikon ja tunturin välissä.
Täränössä oon 441 asukasta (2014) ja alue oon 6 km pitkä suohraan pohjoisesta etehlään ja suunile 3 km leveä. Täränössä oon 11 kylänossaa: Heinonen, Talinen, Iso-Kylä, Kielisennenä, Lehonmäki, Laitamaa, Niva, Kallio, Koijuniemi ja Niemenrova.
Täränössä saatat nauttia mettämaan aartheista koska Täränössä oon koskemattomia erämaita ja vaphaasti pauhaavia väyliä. Täälä puolamäthäät loistava punasenna ja hillajänkät keltasenna, täälä oon rikhaita kalavesiä ja elläinrikhaita mettiä. Täräntö tarjoaa erittäin hyviä kalavesiä, jossa löytyy harria, tampukkaa, lohta, siikaa, haukea ja ahventa. Paras kalastusaika oon kesä, mutta pimplaaminen kauhniina kevätalvipäivänä oon elämys aivan se.
Täränössä oon mailman toiseksi issoin piifyrkkasjuuni. Piifyrkkasjuunin saattaa selvittää niin ette Täränönväylä noutaa vettä Toornionväylästä ja viepii sen Kaihnuunväyhlään. Tavalisuuessa väyhliin tullee vesi jostaki järvestä eli jänkästä, niin tämä ilmiö tekkee Täränön väylän jeulookiseksi sensasjuuniksi. Issoin piifyrkkasjuuni mailmassa löytyy Rio Negron ja Orinocon välissä Eteläameriikassa.
Täränössä saatat kokkeila koskenlaskua, pikkuriistanjahtia, kanuuttimatkoja, koiravaljakkoa ja kylttyyrielämyksiä. Pronsipatsas kylän Charlotte Kallasta löytyy kylän keskustasta.
Täränössä oon sähkövalolatua, urheiluhalli, Nordic gym, skuutteriteitä, jalkapalloplaana missä oon luononruuho ja hyviä kävelypolkuja.
Tervetuloa tänne!
Text: Märta Nylund